MAN UNITED YAJIPANGA KUMNASA BEKI LEIGHTON BAINES WA EVERTON!

 

Mkurugenzi Mtendaji wa Manchester United David Gill amewasiliana na mwenzake wa Everton ili kuanza mazungumzo ya uhamisho wa Fulbeki Leighton Baines kutua Man United.

Inadaiwa Man United wametoa ofa ya Pauni Milioni 12 ili kumchukua Baines ambae pia yumo kwenye Timu ya Taifa ya England lakini Everton wanataka dau la Pauni Milioni 15.

Baines, Miaka 27, ni Fulbeki wa kushoto na ananunuliwa ili amsaidie Patrice Evra ambae amekuwa akicheza nafasi hiyo peke yake kwa muda mrefu na akisaidiwa mara chache na Fabio Da Silva ambae Msimu ujao atapelekwa Ureno, Klabu ya Benfica, kwa mkopo ili apate uzoefu zaidi.

Inasadikiwa Everton wanataka kumuuza Baines ili wapate fedha za kununua Wachezaji wengine na hasa kumrudisha tena Mchezaji wao wa zamani wa Afrika Kusini Steven Pienaar kutoka Tottenham.