ALEX FERGUSON ATEGEMEA KUSAINI WACHEZAJI WAPYA ZAIDI

Bosi wa Manchester United Sir Alex Ferguson ametoboa kuwa wanajaribu kuwasajili Wachezaji kadhaa kwenye kipindi hiki cha uhamisho baada ya kuwanasa Shinji Kagawa kutoka Borussia Dortmund na Nick Powell kutoka Crewe.

Man United wanahusishwa na kutaka kuwanunua Wachezaji kadhaa wakiwemo Leighton Baines wa Everton na Joao Moutinho wa FC Porto.

Akizungumza kwenye TV ya Man United, MUTV, Ferguson alisema: “Ndio upo uwezekano. Tunafanyia kazi dili kadhaa lakini, kwa sasa, hamna cha kutamka.”

Ferguson pia alithibitisha kuwa Dimitar Berbatov bado anabaki kuwa Mchezaji wa Man United na anatarajiwa kuwepo kwenye Ziara ya Klabu hiyo kwa ajili ya Msimu mpya ambayo itawapeleka Afrika Kusini, China na Norway.

Ingawa kumekuwa na imani kubwa kuwa Berbatov atahama, Ferguson amesema: “Hakuna kilichotokea na atajumuika kwenye Ziara ya Afrika Kusini na China”

Aliongeza: “Msimu uliopita haukuwa Msimu mzuri kwake hasa kwa sababu niliwatumia zaidi Wayne Rooney na Danny Welbeck…na Chicharito. Sidhani kama nilimwonea Dimitar lakini lazima atajisikia kuvunjika moyo kwa sababu hakupata namba mara nyingi. Yeye ni kipaji kikubwa!”