CHELSEA WAGOMEWA OFA YAO, NEWCASTLE YAMNASA MFARANSA AMALFITANO!

Mabingwa wa Ulaya, Chelsea, wamegomewa ofa yao ya Pauni Milioni 32.4 kumnunua Kiungo wa Brazil Lucas Moura wa Klabu ya Sao Paulo lakini Newcastle wao wamefanikiwa kumchukua Kiungo wa Klabu ya Ufaransa Reims, Romain Amalfitano.

Kukataliwa kwa ofa ya Chelsea kwa Lucas Moura, Miaka 19 ambae ameichezea Brazil mara 11, kumetobolewa na Rais wa Sao Paulo, Juvenal Juvenico, ambae amedai Mchezaji huyo ana thamani kupita dau hilo.

 

Juvenico pia alidai Inter Milan nao wametoa ofa ya Pauni Milioni 20.2 na pia Real Madrid wamegonga hodi kumuulizia Chipukizi hiyo anaekuja juu kwa moto mkali.

Newcastle United wamezidisha safu yao ya Wachezaji wa Kifaransa baada ya kumnasa Romain Amalfitano ambae Kaka yake, Morgan Amalfitano, ni Mchezaji wa Marseille.

Romain Amalfitano, Miaka 22, atajiunga rasmi na Newcastle kuanzia Julai 1 baada ya Mkataba wake na Reims, aliyoisaidia Msimu huu kupanda Daraja kuingia Ligi 1, kumalizika Juni 30.

Amalfitano atakuwa Newcastle pamoja na Wachezaji wengine toka Ufaransa Yohan Cabaye na Hatem Ben Arfa.