YANGA YATHIBITISHA KOCHA MPYA BRANDTS

>>ALICHEZA KOMBE LA DUNIA NA HOLLAND 1978!!

FAHAMU kwa undani WASIFU wake!!

Klabu Bingwa ya Afrika Mashariki na Kati, Yanga, leo imethibitisha kumchukua Kocha mpya kutoka Uholanzi, Ernstus Wilhelmus Johannes Brandts, kwa Mkataba wa Mwaka mmoja na leo ameanza rasmi kuinoa Timu hiyo huku akikabiliwa na mtihani wake mkubwa wa kwanza hapo Jumatano Usiku kwenye BIGI MECHI na Watani wa Jadi Simba kwenye Mechi ya Ligi Kuu Vodacom itakayochezwa Uwanja wa Taifa Jijini Dar es Salaam.

Brandts, ambae ni Beki wa zamani wa Timu ya Taifa ya Holland, amechukuwa nafasi ya Tom Saintfiet ambae Mkataba wake ulikatizwa baada ya kutoelewana na Uongozi wa Yanga.

Brandts, mwenye Miaka 56, ambae akiwa Yanga atakuwa na Wasaidizi Fred Felix Minziro na Kocha wa Makipa Mfaume Athumani, mara ya mwisho alikuwa Kocha wa APR ya Rwanda.

WASIFU WAKE

JINA: Ernstus Wilhelmus Johannes Brandts

KUZALIWA: 3 Februari 1956, Nieuw-Dijk, Gelderland

KLABU ALIZOCHEZEA

1974–1977   De Graafschap

1977–1986   PSV Eindhoven

1986–1989   Roda JC

1988–1989   MVV Maastricht

1989–1991   K.F.C. Germinal Beerschot

1991–1992   De Graafschap

TIMU YA TAIFA HOLLAND

1977–1985 Mechi 28 Magoli 5

TIMU MENEJA

1993–2002   PSV Eindhoven (Timu ya Vijana na pia kama Msaidizi)

2002–2004   RKSV Nuenen

2005–2006   FC Volendam

2006–2008   NAC Breda

2009  Rah Ahan

2010–2012   APR FC

KUMBUKUMBU YA KIHISTORIA: Katika Fainali za Kombe la Dunia za Mwaka 1978, Brandts aliweka historia ya kuwa Mchezaji pekee aliefunga Mabao kwa Timu zote mbili katika Mechi moja pale kwenye Mechi ya Raundi ya Pili Holland ilipocheza na Italy alipojifunga mwenyewe katika Dakika ya 18 na katika Dakika ya 50 kuifungia Timu yake Holland bao la kusawazisha na hatimae Mechi hiyo kwisha kwa ushindi wa Bao 2-1 kwa Holland huku bao la ushindi likifungwa na Arie Haan.

Brandts alisema amefurahishwa na kujiunga na Yanga ambayo ni Timu kubwa katika Afrika Mashariki ambayo pia anaifahamu vizuri tu baada ya kuiona wakati akiwa Rwanda na APR.

Kuhusu Mechi ya Simba Jumatano, Kocha huyo amesema anaifahamu Simba baada ya kuiona kwenye michuano ya Kagame Cup.

Kocha huyo amesema lengo lake ni kutinga Uwanjani hiyo Jumatano kusaka Pointi 3 ili kuiinua Yanga ipate kuongoza Ligi na hatimae kuwa Bingwa.