ADEBAYOR AUZWA KWA BEI POA SPURS

KLABU ya Tottenham Spurs ipo mbioni kumnunua moja kwa moja mshambuliaji  Emmanuel Adebayor kutoka  Manchester City kwa dau la Pauni 5 milioni kwa mujibu mtandao wa Goal.com. Klabu hiyo ya London imepunguza dau wanalotaka City mara mbili na kudai ipo tayari kutoa Pauni 5 mil kwa ajili ya mshambuliaji huyo wa Togo, pia wanaangalia uwezekano wa kupunguza mshahara wake wa sasa wa Pauni 170,000 kwa wiki. Chanzo cha habari kutoka City kilisema wanategemea uhamisho huo utakamilia na kujiweka vizuri kwa ajili ya mpango wao wa kutaka kumsajili nahodha wa Arsenal, Robin van Persie.Mabingwa hao wa England walitegemea kumuuza Adebayor kwa dau kubwa msimu huu kutokana na awali Paris Saint-Germain na AC Milan kuonyesha nia ya kumtaka, lakini sasa Tottenham imekuwa ni timu pekee yenye nia naye. Adebayor, 28, ameweka wazi nia yake ya kutaka kucheza White Hart Lane chini ya kocha mpya Spurs, Andre Villas-Boas ambaye pia ameonekana kuvutiwa na mshambuliaji huyo wa zamani wa Arsenal. “Tunataka jambo hili limalizike kwa haraka huku pande zote City, Spurs na mchezaji mwenyewe akilizika na hilo,” chanzo hicho kiliimbia Goal.com. “Spurs ndiyo timu pekee iliyokuja kwa ajili ya kufanya mazungumzo juu yake na City ipo tayari kumwachia.” Adebayor alikuwa na mchango mkubwa kwa Tottenham msimu uliopita alipokuwa akicheza kwa mkopo chini ya kocha Harry Redknapp, akiwa amefunga mabao 17 katika Ligi Kuu na kutegeneza mengine 11 katika mechi 33 alizocheza, pia amekuwa na ushirikiano mzuri na winga Gareth Bale. Uwepo wake utakuwa ni faida kubwa kwa kocha Villas-Boas anayetegemea kuanza kibarua chake leo kujindaa na msimu mpya. Adebayor alisajiliwa na City kwa mkataba wa miaka mitano akitokea Arsenal mwaka 2009 kwa gharama ya pauni 25m, lakini hakuwa na wakati mzuri ndani ya uwanja wa Etihad tangu alipoteuliwa Roberto Mancini kuifundisha timu hiyo Desemba 2009. Wakati huohuo;  Fiorentina ipo tayari kutoa pauni 4milioni kwa ajili ya mshambuliaji wa Arsenal, Marouane Chamakh. Mshambuliaji huyo wa Morocco amefunga mabao 12 katika mechi 63 alizocheza Gunners. Vyanzo vya karibu na mchezaji huyo vimedai: “Kuwa klabu hiyo ya Italia imeonyesha nia kubwa ya kutaka kumsajili.”