KOCHA ROBERTO MANCINI AONDOKA GALATASARAY

ROBERTO MANCINI Leo hii ameondoka kwenye wadhifa wake kama Meneja wa Klabu ya Uturuki Galatasaray.
Habari hizi zimethibitishwa na Galatasaray kwa kutoa Taarifa kwamba pande mbili zimekubaliana kwa pamoja kuondoka kwa Mtaliana huyo.
Mancini alitwaa Umeneja wa Galatasaray Septemba Mwaka na kuwawezesha kutwaa Turkish Cup na pia kucheza UEFA CHAMPIONS LIGI Msimu ujao.
Mancini alimrithi Mturuki Fatih Terim ambae alitimuliwa baada ya kugomea nyongeza ya Mkataba.
Hatua hii ya kuachia ngazi kwa Mancini imekuja ghafla na kushangaza kwani Siku mbili tu zilizopita alisisitiza atabaki Turkey.
Akiongea na Gazzetta dello Sport, Mancini alisema: “Naikumbuka Italy, si Familia tu hata Soka lake! Lakini nataka niweke bayana, nitabakia Galatasaray. Nina Mkataba wa Miaka miwili zaidi na hadi sasa nimefanya vyema. Juu ya yote Msimu ujao tunacheza Ulaya UEFA CHAMPIONS LIGI!”
Mancini alianza Kazi yake ya Ukocha huko Italy akitwaa Coppa Italia akiwa na Fiorentina na Lazio kisha kuhamia Inter Milan ambako alitwaa Ubingwa wa Italy, Scudettos, mara 3 na Mwaka 2009 kuhamia England kwa Man City ambako alitwaa FA CUP na Ubingwa wa England kabla kung’oka Mwaka Jana.