USIKU HUU NI PATASHIKA MARYLAND USA! MABINGWA CHELSEA vs BARCELONA

USIKU huu huko Uwanjani FedEx Field, Landover, Maryland, USA, Chelsea itavaana na Mabingwa wa Ulaya FC Barcelona katika mfululizo wa Mechi za Michuano ya International Champions Cup.
Hii ni Mechi ya mwisho kwa Kikosi cha Chelsea chini ya Meneja wao machachari Jose Mourinho kabla ya Jumapili kutinga Wembley Stadium Jijini London kucheza Mechi ya Kufungua Pazia Msimu mpya huko England ya kugombea Ngao ya Jamii dhidi ya Mabingwa wa FA CUP, Arsenal walio chini ya Meneja Arsene Wenger.
Mechi hii inazikutanisha Barcelona na Chelsea ambazo hazina matokeo mazuri katika Mechi zao za kujipima kwa Chelsea kutwangwa 4-2 na New York Red Bulls na kisha kutoka Sare na PSG na kuibuka na ushindi kwa Mikwaju ya Penati tano tano wakati Barcelona wakiwa wamenyukwa 3-1 na Manchester United.
Hadi sasa kwenye Mashindano haya ya International Champions Cup, Man United wana nafasi nzuri ya kutetea Taji lao walilotwaa Mwaka Jana huko huko USA ikiwa hawatafungwa na PSG hapo Jumatano huko Chicago.